თბილისი, 16 დეკემბერი — Sputnik. აშშ-ის ახლადარჩეული პრეზიდენტის ჯო ბაიდენის საინაუგურაციო კომიტეტი ამერიკელებს მოუწოდებს, თავი შეიკავონ ვაშინგტონში ღონისძიებაზე დასასწრებად ჩასვლისგან, ვინაიდან ის შეზღუდული მასშტაბით ჩატარდება, ნათქვამია ორგანიზატორების განცხადებაში.
„ცერემონიის ჩატარების ადგილი უკიდურესად შეზღუდული იქნება... პრეზიდენტის ინაუგურაციის კომიტეტი მოუწოდებს საზოგადოებას, თავი შეიკავონ მგზავრობისგან და საინაუგურაციო ღონისძიებებში მონაწილეობა შინ მიიღონ“, — წერია განცხადებაში.
აქვე აღინიშნება, რომ საორგანიზაციო კომიტეტი ინაუგურაციის შემდეგ აღლუმის ჩატარების საკითხსაც გადახედავს.
14 დეკემბერს აშშ-ის ამომრჩეველთა კოლეგიის კენჭისყრა გაიმართა, რა დროსაც დემოკრატმა ჯო ბაიდენმა 306 ელექტორალური ხმა მიიღო, ხოლო დონალდ ტრამპმა — 232. კონსტიტუციის თანახმად, კოლეგიის კენჭისყრის შედეგები 6 იანვარს უნდა დამტკიცდეს კონგრესის ორივე პალატის ერთობლივ სესიაზე, ხოლო ინაუგურაცია 20 იანვარს გაიმართება.