თბილისი, 7 დეკემბერი — Sputnik. კორონავირუსით ინფიცირებულ ზოგ პაციენტს სხეულის ტემპერატურა მაღლა კი არ უწევს, პირიქით, დაბლა – 35 გრადუსამდეც კი ეცემა, აცხადებს მედიცინის მეცნიერებათა კანდიდატი, კლინიკური ფარმაკოლოგი ანდრეი კონდრახინი.
თუმცა, მისი თქმით, მიუხედავად იმისა, რომ სხეულის დაბალი ტემპერატურა ინფიცირებულ მოხუცებსა და ბავშვებში შეამჩნიეს, ის არ შეიძლება ჩაითვალოს კორონავირუსის სპეციფიკურ სიმპტომად.
ფარმაკოლოგი განმარტავს, რომ კორონავირუსის დროს დაბალი ტემპერატურა ატიპური რეაქციაა და, უფრო მეტიც, ის შეიძლება საერთოდაც არ უკავშირდებოდეს COVID-19-ს.
„ეს სახიფათო სიმპტომი კი არ არის, არამედ ექსკლუზიური რეაქციაა. ასეთი რამ ხშირად გვხვდება გადატანილი ვირუსული ინფექციების შემდეგ, როცა ორგანიზმი ძლიერაა გამოფიტული და ძალას ვერსაიდან იკრებს. გარდა ამისა, დაბალი ტემპერატურა გვხვდება ჰიპოთირეოზის, ონკოლოგიის, ცენტრალური ნერვული სისტემის ტრავმებისა და ღვიძლის დაავადებების დროს“, — აღნიშნა მედიკოსმა.
კონდრახინმა ხაზი გაუსვა იმასაც, რომ კორონავირუსით ინფიცირებისას ღვიძლი ასევე სერიოზულად ზიანდება, რომელიც ორგანიზმის „გათბობაზეა“ პასუხისმგებელი. სწორედ ამის გამოა, რომ ციროზით დაავადებულებში არცთუ იშვიათად გვხვდება დაბალი ტემპერატურა.
გარდა ამისა, ექიმის თქმით, სხეულის დაბალი ტემპერატურა შეიძლება იყოს თანდაყოლილი, ზოგი სამედიცინო პრეპარატის მოქმედების შედეგი ან ნარკოდამოკიდებულებაზე მეტყველებდეს.