თბილისი, 15 ნოემბერი - Sputnik. პარტია „ლელოს“ ოფისში ოპოზიციური პარტიების წარმომადგენლები სამომავლო სტრატეგიასთან და მომავალ კვირას დაგეგმილ აქციებთან დაკავშირებით შეხვედრას მართავენ, იუწყებს ტელეკომპანია „რუსთავი2“.
მანამდე ოპოზიციამ უახლოეს მომავალში სამი აქცია დააანონსა: 17-18 ნოემბერს, აშშ-ის სახელმწიფო მდივნის მაიკ პომპეოს ვიზიტის დროს, მაჟორიტარულ ოლქებში არჩევნების მეორე ტურის დღეს - 21 ნოემბერს და ახალი პარლამენტის პირველი სხდომის დღეს, თუმცა ეს თარიღი ჯერ დაზუსტებული არ არის.
გავრცელებული ინფორმაციით, ოპოზიციური პარტიების შეხვედრის მთავარი თემა არის საპროტესტო აქცია აშშ-ის სახელმწიფო მდივნის ვიზიტის დროს, რათა კიდევ ერთხელ მოხდეს იმის დაფიქსირება, რომ ოპოზიცია არჩევნების გაყალბებას არ ეგუება.
„ეს იქნება ძალიან სანახაობრივი აქცია, არატრადიციული, შთამბეჭდავი აქცია. ჩვენ გვინდა ამით მივაწვდინოთ ხმა აშშ-ის სახელმწიფო მდივანს იმ რეალობაზე და პოლიტიკურ კრიზისზე, რომელიც ხელისუფლების წყალობით ქვეყანაშია. თუ ჩაინიშნა შეხვედრა ოპოზიციასთან, ეს იქნება ასევე ძალიან კარგი", - განაცხადა „ერთიანი ნაციონალური მოძრაობის" წევრმა ზაალ უდუმაშვილმა.
უდუმაშვილის თქმით, ავტორიტეტული არასამთავრობო ორგანიზაციები მიაწვდიან ინფორმაციას სახელმწიფო მდივანს ქვეყანაში არსებული პრობლემების შესახებ.
ასევე, ოპოზიცია თვლის, რომ ხელისუფლების მხრიდან გაკეთებული შეთავაზება ბიულეტენების გადათვლასთან დაკავშირებით არადამაკმაყოფილებელია. „ევროპული საქართველოს" წევრის, ლევან თარხნიშვილის თქმით, გაყალბება იმდენად მასშტაბური იყო, რომ მხოლოდ ბიულეტენების გადათვლა ამ ხარვეზს ვერ გამოასწორებს.
ოპოზიცია 31 ოქტომბრის საპარლამენტო არჩევნების შედეგებს არ აღიარებს და ხელახალ არჩევნებს მოითხოვს, ქვეყანაში ორი კვირის განმავლობაში საპროტესტო აქციები იმართება. არჩევნების შედეგებს არ ცნობს არცერთი პარლამენტში გასული ოპოზიციური პარტია - მათ განაცხადეს, რომ მეათე მოწვევის საკანონმდებლო ორგანოს მუშაობაში მონაწილეობას არ მიიღებენ.
მმართველ პარტიაში ოპოზიციის უკმაყოფილებას დესტრუქციად აფასებენ და მას დესტაბილიზაციის მცდელობებსა და სიტუაციის ხელოვნურ დაძაბვაში ადანაშაულებენ.
სიტუაციის მოგვარებას ცდილობენ დასავლური დიპლომატიური მისიები, რომლებმაც მხარეები მოლაპარაკებებისკენ მოიხმეს, თუმცა ორი რაუნდის შემდეგ ხელისუფლების და ოპოზიციის პოზიციები არ შეცვლილა.