თბილისი, 12 ნოემბერი – Sputnik. მებაჟე ოფიცრებმა საფოსტო გზავნილში 14 ათასი აშშ დოლარის ოდენობის არადეკლარირებული თანხა აღმოაჩინეს, იუწყება საქართველოს ფინანსთა სამინისტროს შემოსავლების სამსახური.
„აეროპორტის“ საფოსტო გზავნილების საბაჟო კონტროლის სამმართველოს მებაჟე-ოფიცრებმა საქართველოს მოქალაქე ნ.გ.-ს კუთვნილი საფოსტო გზავნილის დათვალიერების შედეგად არადეკლარირებული თანხა – 14 ათასი აშშ დოლარი (45053,4 ლარი) და 5 902 ევრო (34285 ლარი) აღმოაჩინეს“, – ნათქვამია განცხადებაში.
საბაჟო კოდექსის 169-ე მუხლის მეორე ნაწილის თანახმად, კანონდამრღვევ მოქალაქეს სანქციის სახით 5 ათასი ლარის ოდენობით ფულადი ჯარიმა დაეკისრა.
უკანონო შემოსავლების ლეგალიზაციის აღკვეთის მიზნით საქართველოს საბაჟო ტერიტორიაზე ნაღდი ფულისა და ფასიანი ქაღალდების შემოტანა და გატანა ფინანსთა სამინისტროს შემოსავლების სამსახურის მხრიდან მკაცრ კონტროლს ექვემდებარება.