თბილისი, 30 ოქტომბერი - Sputnik. საქართველოს კათოლიკოს-პატრიარქი ილია მეორე მოსახლეობას არჩევნებში მონაწილეობისკენ მოუწოდებს, იუწყება საქართველოს საპატრიარქო.
როგორც მიმართვაშია აღნიშნული, ეკლესია ყოველთვის იყო და არის ხალხის გამაერთიანებელი ძალა და პოლიტიკური მიკერძოება მისთვის უცხოა.
„ჩვენი ხალხი გონიერია და, მიუხედავად სხვადასხვა მცდელობისა, კარგად აფასებს მოვლენებს. ამიტომაც მოგმართავთ ყველას, მიიღეთ მონაწილეობა არჩევნებში, რათა გამოვლინდეს უმრავლესობის ნება და თითოეული თქვენგანი სწორი გადაწყვეტილებით დაეხმაროს სამშობლოს“, - ნათქვამია პატრიარქის მიმართვაში.
დღეს ცნობილი გახდა, რომ ქვეყანაში შექმნილი ეპიდვითარებიდან გამომდინარე საქართველოს კათოლიკოს-პატრიარქი ილია მეორე საქართველოს საპარლამენტო არჩევნებზე ხმას გადასატანი ყუთის მეშვეობით მისცემს.
ხვალ, 31 ოქტომბერს საქართველოში საპარლამენტო არჩევნები ტარდება, რომელშიც 48 პარტია და ორი ბლოკი მონაწილეობს. ქვეყნის მოსახლეობა 150 დეპუტატს აირჩევს – 120-ს პროპორციული სისტემით, 30-ს კი მაჟორიტარული წესით.