თბილისი, 20 ოქტომბერი – Sputnik. კორონავირუსის პანდემიით გამოწვეული მიზეზების გამო 2020 წელს დაგეგმილი რაგბის სანაკრებო მატჩები გაურკვეველი ვადით გადაიდო. ინფორმაციას „რაგბი ევროპა“ (RUGBY EUROPE) ავრცელებს.
გადადებულ მატჩებს შორისაა საქართველოსა და რუსეთის დაპირისპირებაც, რომელიც მიმდინარე წლის 1 ნოემბერს უნდა გამართულიყო.
„რაგბი ევროპის“ ცნობით, მატჩების ჩატარების თარიღს ორგანიზაცია პროფკავშირებთან და შესაბამის სამედიცინო ორგანიზაციებთან კონსულტაციების შემდეგ დანიშნავს.
„რაგბი ევროპის“ პრეზიდენტი ოქტავიან მორარიუ შექმნილ ვითარებაზე საუბრობს და ამბობს, რომ ისინი იძულებული არიან უახლოეს მომავალში გასამართი ნაკრებების შეხვედრები გადადონ.
„უნდა გავუფრთხილდეთ მოთამაშეების, გულშემატკივრებისა და რაგბიში დასაქმებული ადამიანების ჯანმრთელობას. სანამ სათამაშოდ უკეთესი პირობები არ იქნება, მოთმინება გვმართებს“, – განაცხადა ოქტავიან მორარიუმ.
ქართველ მორაგბეებს 2020 წლის ბოლო ტურის მატჩი რუსეთთან უნდა გაემართათ.
თავდაპირველად ევროპის ჩემპიონატის ჯგუფურ ეტაპზე ლევან მაისაშვილის გუნდი „დათვებს“ 2020 წლის 14 მარტს უნდა შეხვედროდა, თუმცა მსოფლიოში კორონავირუსისგან გამოწვეული მდგომარეობის გამო მატჩი 1 ნოემბრამდე გადაიდო.
სატურნირო თვალსაზრისით ქართული გუნდისთვის რუსეთის ნაკრებთან შეხვედრას არანაირი მნიშვნელობა არ აქვს, რადგან ის ევროპის ერთა თასის გამარჯვებული ვადამდე გახდა – ზედიზედ მესამედ და მეთორმეტედ ისტორიის განმავლობაში.
საქართველოს რაგბის ნაკრებს 2020 წლის 7 მარტის შემდეგ ოფიციალური შეხვედრა არ ჩაუტარებია.
„რაგბი ევროპის“ ჩემპიონატის ჯგუფში ჩვენი ნაკრები აბსოლუტური შედეგით (4-დან 4 გამარჯვება) პირველ ადგილს იკავებს.