„გოგიჩას ქუჩის ფერები“ – ნანუკა გოგიჩაიშვილის ემოციური პოსტი გარდაცვლილ მამაზე

 თბილისი, 19 ოქტომბერი – Sputnik. „ჩემი მამა… ყველაზე კეთილი, თბილი და ტკბილი. მიყვარხარ უზომოდ, მეამაყები და მეიმედები! მიხარია შენი ნაწილი რომ ვარ და შენი იდეოლოგიის, სიკეთის და ადამიანობის მატარებელი! მიხარია ის დრო, რაც გვაჩუქე და მადლიერი ვარ ყოველი წამის! ჩემი სიამაყე ხარ, არ მინდა იმედი გაგიცრუო... (ჩემი თაფლის ხმიანი მამა)“, – წერს ნანუკა გოგიჩაიშვილი.

ეს გულისამაჩუყებელი პოსტი გოგიჩას უფროსმა ქალიშვილმა ჯვრისწერამდე რამდენიმე დღით ადრე გამოაქვეყნა. ნანუკას და ნინის მამა ყოველ ჯერზე უფრო მეტად ენატრებათ. გარდაცვლილ მამას კი სოციალურ ქსელში ემოციურ სიტყვებს უძღვნიან და თითქოს საზოგადოების გამხნევებით კიდევ ერთხელ ამტკიცებენ, რომ გოგიჩა სადღაც მათთან ახლოს არის.

ოქროსფერი შემოდგომის ფოტო ნანუკა გოგიჩაიშვილმა გამოაქვეყნა. როგორც ჩანს, გარდაცვლილ მსახიობს ძალიან უყვარდა წლის ეს პერიოდი. „გოგიჩას ქუჩის ფერები... პატარა მამას ფერები, როგორც ეს დედამ თქვა“, – ამ წარწერით მოდელმა საკუთარ გვერდზე გამოაქვეყნა ფოტო.

მისი თქმით, მთელი ბავშვობა იტანჯებოდა მამის გადამეტებული სიყვარულით და ყოველ ღამით კოშმარებს ხედავდა, რომ მამას ართმევდნენ, კლავდნენ, ხოლო გამოღვიძებისას ეუბნებოდნენ, რომ ეს სიზმრები იმას ნიშნავდა, რომ მამა დიდხანს იცოცხლებდა.

ცნობილი მსახიობი და ტელეწამყვანი გიორგი გოგიჩაიშვილი მძიმე ავადმყოფობის შემდეგ 2019 წლის ივლისში, 51 წლის ასაკში დაიღუპა. ბოლო წლებში მსახიობი სიმსივნეს ებრძოდა.