თბილისი, 16 ოქტომბერი – Sputnik. ოზურგეთის მუნიციპალიტეტის ქვედა ბახვის საჯარო სკოლის დირექტორი მისივე სკოლის მოსწავლეზე ფიზიკურ ძალადობაშია ბრალდებული, იუწყება ტელეკომპანია „რუსთავი 2".
მეშვიდე კლასის მოსწავლე საგანგებო სიტუაციების მართვის ცენტრს („112“) ორი დღის წინ თავად დაუკავშირდა და პოლიციას მასზე განხორციელებული ძალადობის შესახებ შეატყობინა.
როგორც სკოლის დირექტორმა დოდო გოთუამ ჟურნალისტებთან განაცხადა, ფიზიკურ ძალადობას ადგილი არ ჰქონია, ბავშვს მხოლოდ სიტყვიერი, ხმამაღალი შენიშვნა მისცა. მისი თქმით, შენიშვნა სხვა მოსწავლეებმაც მიიღეს, რადგან ისინი სადეზინფექციო ხსნარით წუწაობდნენ.
კლასის დამრიგებელი კონკრეტულ ინციდენტს არ შესწრებია, თუმცა ძალადობის ფაქტს არ გამორიცხავს. მისი თქმით, მოსწავლესა და დირექტორს შორის კონფლიქტი გასულ წელსაც მოხდა.
მომხდარ ფაქტზე მოკვლევას ოზურგეთის პოლიცია აწარმოებს.