თბილისი, 14 ოქტომბერი - Sputnik. თბილისის ინფექციური საავადმყოფოს დირექტორმა თენგიზ ცერცვაძემ ადამიანებს, რომლებმაც კორონავირუსი გადაიტანეს, ახლადინფიცირებულთა სამკურნალოდ პლაზმის ჩაბარებისკენ მოუწოდა.
საქართველოში კორონავირუსი უკვე 7 159 ადამიანმა დაამარცხა, თუმცა ინფიცირებულთა რაოდენობა დღითიდღე მატულობს.
„პლაზმის გადასხმა საკმარისად ეფექტურია იმისათვის, რომ ავადმყოფების გარკვეული რაოდენობა გადავარჩინოთ. ჩვენ ეს პლაზმა 6 შემთხვევაში გამოვიყენეთ მძიმე ავადმყოფების შემთხვევაში და ყველა მათგანი გადარჩა. ამას ვიყენებთ იმისათვის, რომ დონორები არ გვყავს. მინდა მივმართო ყველა იმ მოქალაქეს, ვინც COVID ინფექცია გადაიტანა, მოგვმართონ და ჩააბარონ პლაზმა",- განაცხადა თენგიზ ცერცვაძემ ტელეკომპანია Rustavi 2-ის ეთერში.
ცერცვაძემ ადრე განაცხადა, რომ პლაზმა შეიცავს დამცავ მანეიტრალებელ ანტისხეულებს, რომლებსაც კორონავირუსით დაავადებული პაციენტების ორგანიზმში ვირუსის განეიტრალება შეუძლიათ.
დღეისათვის ქვეყანაში კორონავირუსით ინფიცირებული 6 362 პაციენტი მკურნალობს.
პირველი შემთხვევის გამოვლენიდან კორონავირუსით ინფიცირების 13 521 შემთხვევა გამოვლინდა. ამ პერიოდში ამ ვირუსს 109 ადამიანი ემსხვერპლა.