თბილისი, 7 ოქტომბერი — Sputnik. არსებობს პროდუქტები, რომელთა მიღებაც დაუშვებელია ანტიბიოტიკებით მკურნალობის დროს, აცხადებს ენდოკრინოლოგი, მედიცინის მეცნიერებათა კანდიდატი ზუხრა პავლოვა.
მისი თქმით, ანტიბიოტიკური თერაპიის დროს აუცლებელია რაციონიდან გამოირიცხოს რთულად მოსანელებელი საკვები, რათა ღვიძლი ზედმეტად არ გადაიტვირთოს.
„ესენია: ცხიმიანი, შემწვარი, მარილიანი საკვები, მარინადები, შებოლილი ხორცი, ძეხვი, მაიონეზი და სხვა სოუსები, ნატურალური ხილისა და კენკრის წვენები“, – წერს ენდოკრინოლოგი.
გარდა ამისა, ანტიბიოტიკებით მკურნალობის დროს უარი უნდა ვთქვათ ტკბილ ხილზე, მაგალითად, ბანანზე.
ექიმის განმარტებით, რაციონის გამრავალფეროვნება ფერმენტირებული რძის პროდუქტებით არის შესაძლებელი, მაგალითად, იოგურტებით (კენკრისა და დანამატების გარეშე), დოთი ან კეფირით.
ამასთან ენდოკრინოლოგი გვირჩევს, ანტიბიოტიკური თერაპიის დროს ყურადღება მივაქციოთ ამინომჟავა მეთიონინის შემცველ საკვებსაც: წითელ ხიზილალას, კალმარებს, თევზეულს — სკუმბრიას, მინტაის, ქორჭილასებრთა და ორაგულის ოჯახის თევზს, კვერცხს, ხაჭოს, ყველს, ოსპსა და კაკალს. მეთიონინის მიღება ასევე შეგიძლიათ ცხვრის, საქონლისა და ქათმის ხორციდან.
როგორ ამოვიცნოთ დიაბეტის პირველი ნიშნები: ენდოკრინოლოგი გვირჩევს>>
ექიმმა ასევე განმარტა, რომ მთავარი და მარტივი წესი, რომელიც ანტიბიოტიკების კურსის მიღების დროს უნდა დაიცვათ, ისაა, რომ ბევრი წყალი უნდა სვათ. მისი აზრით, ზრდასრულებისთვის დღეში მინიმუმ 1,5 ლიტრი წყალია რეკომენდებული.