თბილისი, 26 სექტემბერი — Sputnik. თელავში, საკარანტინო სივრცეში 29 წლის ვინმე გ.გ. გარდაიცვალა, ნათქვამია შსს-ს მიერ გავრცელებულ განცხადებაში.
ცნობილია, რომ მამაკაცი 24 სექტემბერს საფრანგეთიდან დაბრუნდა საქართველოში, რის შემდეგაც თელავში სასტუმროში სავალდებულო კარანტინში გადაიყვანეს.
29 წლის მამაკაცი სასტუმროს პერსონალმა გარდაცვლილი ნახა. გარდაცვლილის ცხედარი ექსპერტიზაზეა გადასვენებული.
ტელეკომპანია Rustavi2-ის ერთ-ერთი ვერსიით, მამაკაცი მეტადონის პროგრამით სარგებლობდა. თუმცა გარდაცვალების ზუსტი მიზეზი ამ ეტაპზე უცნობია.
მომხდარ ფაქტზე გამოძიება სსკ-ის 115-ე მუხლით დაიწყო, რაც თვითმკვლელობამდე მიყვანას გულისხმობს. ამ მუხლით საქმე აღიძრება მაშინ, როდესაც ცხედარს არ აღენიშნება რაიმე ძალადობის კვალი და ადამიანი მარტო ყოფნისას გარდაიცვალა, თუმცა შემდგომში საქმის გადაკვალიფიცირება შეიძლება მოხდეს.