თბილისი, 1 სექტემბერი – Sputnik. სახელმწიფო უსაფრთხოების სამსახურის (სუს-ის) ერთ თანამშრომელს კორონავირუსი დაუდასტურდა, იუწყება „პირველი არხი“.
სამსახურის 38 თანამშრომელი კი კარანტინში იმყოფება. უკვე ჩატარებულია სახელმწიფო უსაფრთხოების სამსახურის შენობის სადეზინფექციო სამუშაოებიც.
„ტესტირება ჩაუტარდა ყველას, ვინც შემხებლობაში იყო ინფიცირებულთან. ინფიცირებულია ერთ-ერთი დეპარტამენტის რიგითი თანამშრომელი“, – განაცხადეს სუს-ში.
საქართველოში ბოლო დღე-ღამეში კორონავირუსის 23 ახალი შემთხვევა დაფიქსირდა. აქედან ერთის წყარო უცნობია.
ეზუგბაია: კორონავირუსის შემთხვევების დიდი ნაწილი ინფიცირებულებთან კონტაქტია >>
ბოლო მონაცემებით, საქართველოში კორონავირუსის 1510 შემთხვევა გამოვლინდა. გამოჯანმრთელდა 1253, გარდაიცვალა – 19, კარანტინში იმყოფება 5828 ადამიანი, ხოლო სტაციონარებში ექიმების დაკვირვების ქვეშ 232 პაციენტია.
ქვეყანაში კორონავირუსით ინფიცირების პირველი შემთხვევა 26 თებერვალს დაფიქსირდა.