თბილისი, 18 აგვისტო – Sputnik. ახალი ტიპის კორონავირუსით რეინფიცირება შეიძლება ორი-სამი თვის შემდეგ მოხდეს, ამის შესახებ რადიოსადგურ Говорит Москва-ს ეთერში ექიმმა იმუნოლოგმა ნიკოლაი კრიუჩკომ ისაუბრა.
სპეციალისტის თქმით, ეს დამოკიდებულია იმაზე, თუ რამდენ ხანს გაგრძელდება ორგანიზმში ანტისხეულების მაღალი დონე.
„უამრავ ადამიანში ანტისხეულების დონე ძალიან სწრაფად იკლებს ავადმყოფობის შემდეგ. ორი ან სამი თვე გადის და ანტისხეულების დონე ძალიან ქვეითდება. ჯერჯერობით უცნობია, რასთან არის ეს დაკავშირებული“, – განაცხადა კრიუჩკომ.
ექიმმა ასევე აღნიშნა, რომ ადამიანთა უმეტესობაში ანტისხეულები საკმაოდ დიდი ხნის განმავლობაში რჩება. „კორონავირუსი არსად წასულა, ინფიცირება აბსოლუტურად შესაძლებელია“, – განაცხადა მან.
ჯანმოს უახლესი მონაცემებით, მთელ მსოფლიოში ახალი კოროვირუსით ინფიცირებულთა რეგისტრირებული შემთხვევების მთლიანი რაოდენობა 18 აგვისტოს დილის მონაცემებით 21 549 706 ადამიანია, გარდაიცვალა 767 158. ჯანმრთელობის მსოფლიო ორგანიზაციამ ახალი COVID-19-ის პანდემია 11 მარტს გამოაცხადა.