რაჭაში ძლიერი წვიმების შედეგად ნაპირებიდან გადმოვიდა მდინარეები, რის გამოც ონის რაიონში დაზიანდა საცხოვრებელი სახლები, გზები და ინფრასტრუქტურა. ადიდებულმა მდინარეებმა დატბორა მიმდებარე ტერიტორიები. შედეგად – 12 სოფელი, რომლებშიც დაახლოებით 2 ათასი ადამიანი ცხოვრობს, გარე სამყაროს მოწყვეტილი აღმოჩნდა.
საქართველოს პრემიერ-მინისტრის თქმით, სტიქიური უბედურების შედეგად ზარალმა შესაძლოა 150 მილიონ ლარს მიაღწიოს. ადგილზე მიმდინარეობს სალიკვიდაციო სამუშაოები, მობილიზებულია მძიმე ტექნიკა, პარალელურად გაყვანილია რამდენიმე შემოვლითი გზა. ზოგიერთ სოფელში უკვე აღდგა ელექტროენერგიის მიწოდება.