თბილისი, 24 ივლისი — Sputnik. საქართველოს მოქალაქეები, რომლებსაც არ გააჩნიათ აშშ-ში ლეგალური ბინადრობის უფლება, ისევე, როგორც სხვა ქვეყნების მოქალაქეები, ვერ შეძლებენ ქვეყნის ტერიტორიაზე შესვლას იმ შემთხვევაში, თუ ისინი ბოლო 14 დღის მანძილზე იმყოფებოდნენ (თუნდაც ტრანზიტით) შენგენის ზონის ტერიტორიაზე, დიდ ბრიტანეთში, ბრაზილიაში, ჩინეთსა და ირანში, იუწყება საქართველოში აშშ-ის საელჩო.
საემიგრაციო ვიზა ლეგალური ბინადრობის (Green card) უფლებას არ წარმოადგენს. შესაბამისად, საემიგრაციო ვიზის მფლობელი ზემოთ აღნიშნული ქვეყნების გავლით აშშ-ის ტერიტორიაზე მოხვედრას ვერ შეძლებს.
აშშ-ის მთავრობის განკარგულება გამონაკლისს უშვებს უცხოეთის გარკვეულ მოქალაქეებზე, მათ შორის, აშშ-ის მოქალაქეების არასრულწლოვან ოჯახის წევრებზე, უცხო ქვეყნის მთავრობის წარმომადგენლებზე და მათი ოჯახის წევრებზე.
აშშ-ის სახელმწიფო დეპარტამენტმა ეროვნული ინტერესების სასარგებლოდ გამონაკლისი დაუშვა ასევე უცხოეთის გარკვეულ მოქალაქეებზე – ინვესტორებზე, აკადემიკოსებზე, სტუდენტებზე, სახელშეკრულებო ტრეიდერებსა და ბიზნესმენებზე.
ჯონს ჰოპკინსის უნივერსიტეტის მონაცემებით, კორონავირუსის პანდემიის დაწყების დღიდან აშშ-ში ინფიცირების 4 მილიონზე მეტი შემთხვევა დაფიქსირდა, გარდაცვლილთა რაოდენობამ კი 144 ათასს გადააჭარბა.