თბილისი, 5 ივლისი — Sputnik. კორონავირუსით ინფიცირების სამივე ახალი შემთხვევა იმპორტირებულია, პირველი არხის ეთერში განაცხადა საქართველოს დაავადებათა კონტროლის ეროვნული ცენტრის დირექტორმა ამირან გამყრელიძემ.
გამყრელიძის თქმით, სამიდან ორი დაავადებული ტრაილერების მძღოლია.
ერთ დღე-ღამეში საქართველოში კორონავირუსით ინფიცირების ხუთი ახალი შემთხვევა გამოვლინდა. სამი დაავადებულის შესახებ ინფორმაცია StopCov.ge-ზე ამ დილით გამოჩნდა.
გუშინ გავრცელდა ინფორმაცია, რომ დღისით გამოვლენილი ორი შემთხვევა აჭარაში დაფიქსირდა. ერთ-ერთი არის 27 წლის მამაკაცი, რომელიც თურქეთის გავლით ყაზახეთიდან დაბრუნდა, ხოლო მეორე ქალია და ის ერთ-ერთ ადგილობრივ კლინიკაში მუშაობს.
ამჟამად საქართველოში კორონავირუსის 951 შემთხვევა დადასტურდა, გამოჯანმრთელდა 828 ადამიანი.