თბილისი, 19 ივნისი — Sputnik. ცნობილი წყვილი – მომღერალი ლელა წურწუმია და პროდიუსერი კახა მამულაშვილი – კორონავირუსის პანდემიის გამო შემოსავლის გარეშე დარჩა. აღნიშნულის შესახებ მათ რადიო „ფორტუნას“ ეთერში ისაუბრეს გადაცემაში „ავტორის ხმა“.
„უმძიმეს მდგომარეობაში აღმოვჩნდით. სხვების მსგავსად მეც ბანკის მევალე ვარ და წარმოდგენა არ მაქვს, როგორ გადავიხდი კრედიტს სამსახურის გარეშე დარჩენილი“, – განაცხადა ლელა წურწუმიამ.
მისი თქმით, მართალია, გარეგნულად შოუბიზნესი ყოველთვის ბრწყინავს, მაგრამ მოსაზრება, თითქოს პრობლემები არ აქვს – მცდარია.
„არ მივეკუთნებით მათ რიცხვს, ვინც სახელმწიფო ბიუჯეტით სარგებლობს, ამიტომ დამოუკიდებლად გვიწევს საკუთარ თავზე ზრუნვა. თუმცა, სახელმწიფოსგან არა ფინანსურ დახმარებას, არამედ რეგულაციების გადახედვას და მოწესრიგებას მოვითხოვთ, რათა ისევ თვითონ შევძლოთ საკუთარი თავის უზრუნველყოფა", – განაცხადა მომღერალმა.
მომღერალმა ლელა წურწუმიამ იძულებითი რამდენიმეთვიანი პაუზის შემდეგ გადაწყვიტა საყვარელ საქმიანობას დაუბრუნდეს და ჯგუფ „ნონ სტოპთან” ერთად რამდენიმე დღის წინ პირველი რეპეტიციაც გამართა.
ელეგანტური, ეშხიანი, განსაკუთრებული ტემბრისა და ხმის მქონე მომღერალი წლებია პოპულარობას არ კარგავს. უშუქობაში დაწერილი სიმღერები დღემდე ჰიტია. მისი შემოქმედება ლელა წურწუმიას ქალიშვილის თანატოლებმაც კი ზეპირად იციან და ყოველ სოლო კონცერტს დიდი ინტერესით ელოდებიან. საქართველოში ერთადერთი ქალი შემსრულებელია, რომელმაც კარიერის მანძილზე 12 ალბომი გამოუშვა.
ბნელი 90-იანების დასაწყისში დაწყებული ბრწყინვალე კარიერა დღემდე წარმატებით მიმდინარეობს. ლელა წურწუმია ყველაზე მაღალანაზღაურებადი ქართველი მომღერალია, რომლის კარიერაც 1991 წელს დაიწყო. ლელა 1969 წლის 12 თებერვალს თბილისში, მხატვრის ოჯახში დაიბადა. ჰყავს დედა, ორი და, მეუღლე და ქალიშვილი მარიკო მამულაშვილი.