თბილისი, 18 ივნისი — Sputnik. იტალიაში ორი დღის წინ ეპიდემიასთან დაკავშირებული შეზღუდვების შესუსტებას კორონავირუსით ინფიცირების შემთხვევების ზრდა მოჰყვა, იუწყება სააგენტო ANSA.
აღსანიშნავია, რომ იტალიაში საკარანტინო ზომების შესუსტების ფინალური პაკეტი 15 ივნისს ამოქმედდა.
გავრცელებული ინფორმაციით, ერთ დღე-ღამეში ინფიცირებულთა რაოდენობის ზრდამ 329 კაცი შეადგინა, ხოლო ერთი დღით ადრე ზრდის მაჩვენებელი 210 ადამიანი იყო.
გარდა ამისა, სააგენტოს ცნობით, იზრდება მსხვერპლის რაოდენობის მაჩვენებელიც. კერძოდ, ბოლო 24 საათის განმავლობაში გარდაიცვალა COVID-19-ით დაავადებული 43 ადამიანი, ხოლო ერთი დღით ადრე მსხვერპლის რაოდენობა 34 კაცი იყო.
დღეისათვის იტალიაში COVID-19-ით გარდაცვლილთა საერთო რაოდენობა 34 448 კაცია, გამოჯანმრთელდა 179 455 პაციენტი.
არსებობს ახალი აფეთქების რისკი: ჩინეთის მთავარი ეპიდემიოლოგი პეკინის შტამზე საუბრობს>>
მანამდე ცნობილი გახდა, რომ მას შემდეგ, რაც თურქეთში კაფეები, რესტორნები, სპორტდარბაზები, პარკები და პლაჟები გაიხსნა, კორონავირუსით ინფიცირებულთა რაოდენობა კვლავ გაიზარდა. ოფიციალური ინფორმაციით, ქვეყანაში ბოლო პერიოდში COVID-19-ით ინფიცირებულთა სადღეღამისო რაოდენობა 1500 კაცს აჭარბებს. ეს მაშინ, როცა მანამდე დღე-ღამეში მაქსიმუმ 800–900 ადამიანი ინფიცირდებოდა.
გარდა ამისა, ვრცელდება ინფორმაცია, რომ ისრაელმა მკაცრი საკარანტინო ზომები 1 აგვისტომდე გაახანგრძლივა, ვინაიდან ინფიცირებულთა რაოდენობა ივნისში ექვსჯერ გაიზარდა.