თბილისი, 1 ივნისი – Sputnik. ტელეკომპანია „TV პირველში“ მთავარი პროდიუსერი ნოდარ მელაძე, რომელმაც ცოტა ხნის წინ „მთავარი არხი“ დატოვა, გამოეხმაურა კრიტიკოსებს, რომლებიც ამბობდნენ, რომ „ბიძინა ივანიშვილმა იყიდა“, ან ის „TV პირველზე“ ექს-პრეზიდენტმა მიხეილ სააკაშვილმა ჩანერგა“.
„რადგან ლანძღვის კორიანტელში ჩემი 9 თვის ტყუპებიც გახვიეს, მაინც მომიწევს ამ თემაზე საუბარი. „მთავარიდან“ შემთხვევით არ გავმქრალვარ, მაგრამ არ მინდა ჩემი ნათქვამით თუნდაც მცირედით დაზარალდეს ტელევიზია, სადაც ახლაც ჩემი ბევრი მეგობარი მუშაობს. არ უნდა დავკარგოთ სახე, მადლობა ვუთხრათ ერთმანეთს და ასე დავემშვიდობოთ“, – განაცხადა ნოდარ მელაძემ.
„მთავარი არხიდან“ წასული არხის საინფორმაციო სამსახურის უფროსი ნოდარ მელაძე ტელეკომპანია „TV პირველის“ გენერალურ პროდიუსერად მაისის დასაწყისში დაინიშნა. მელაძეს „მთავარი არხიდან" წასვლის მიზეზი არ უთქვამს. Facebook-ზე მან მხოლოდ ეს დაწერა: „ბევრი წარმატება იმ მაგარ გუნდს, რომელიც რჩება ამ არხზე“.
„მთავარი არხის“ დაფუძნებამდე ნოდარ მელაძე „რუსთავი 2“-ში მუშაობდა და ბოლო პერიოდში საინფორმაციო სამსახურის ხელმძღვანელი იყო. ქიბარ ხალვაშის მიერ „რუსთავის 2“-ის გადაფორმებიდან ერთი თვის თავზე ის სამსახურიდან გაათავისუფლეს. ამის შემდეგ ტელეკომპანიის ჟურნალისტების ნაწილთან ერთად მუშაობა „მთავარ არხზე“ გააგრძელა.
„TV პირველის“ გუნდს „მთავარი არხიდან“ წასული ოთხი ჟურნალისტიც შეუერთდა. ეკო მაღრაძე, ვასილ დაბრუნდაშვილი, მაკა ანდრონიკაშვილი და რუსუდან ჯაბანიშვილი ამჟამად „TV პირველში“ განაგრძობენ მუშაობას.