სამედიცინო კორპორაცია „ევექსის“ მმართველი „საქართველოს ჯანდაცვის ჯგუფის“ (GHG) დირექტორმა ნიკოლოზ გამყრელიძემ ტელეწამყვან თათია შარანგიას „ინსტაგრამის ლაივში“ ჩართვისას მისი და მისი მეუღლის სოფო კომახიძის ურთიერთობაზე ისაუბრა. როგორც გაირკვა, წყვილს საკმაოდ ჰარმონიული ოჯახი აქვს, რომელიც უკვე ათ წელზე მეტს ითვლის.
„საერთო მეგობარი გვყავს, 2005 წელს გავიცანით ერთმანეთი და 2007 წლის თებერვალში დავქორწინდით, უკვე 13 წელი გავიდა. სოფოში ყველაზე მეტად ის სითბო მიყვარს, რაც ოჯახის, ჩემი და ჩემი ბავშვების მიმართ აქვს. ვცდილობ ხშირად დავუთმო, მაგრამ უფრო დაბალანსებული ურთიერთობა გვაქვს“, - განაცხადა ექიმმა.
თათია შარანგია დაინტერესდა, როგორი კულინარია უმცროსი გამყრელიძის მეუღლე. ნიკოლოზ გამყრელიძე ამბობს, რომ ოჯახს უმეტესად რესტორნებში სიარული უყვარს და სახლში იშვიათად აკეთებენ კერძებს. მეუღლე ძალიან დაკავებულია, ბოლო ორი წელი სწავლა გადაწყვიტა, სამსახურს თავი დაანება და სამ ბავშვს უვლის.
საქართველოს დაავადებათა კონტროლის ეროვნული ცენტრის დირექტორის ამირან გამყრელიძის ვაჟი ნიკოლოზ გამყრელიძე კორონავირუსისგან 1 აპრილს განიკურნა. ის ერთ-ერთი პირველი იყო, ვისაც საქართველოში ვირუსი დაუდგინდა და ამის შესახებ სოციალურ ქსელში თავად დაწერა. პაციენტი #5, ვისგანაც გამყრელიძეს კორონავირუსი გადაედო, ორთვიანი მკურნალობის შემდეგ ცოტა ხნის წინ გამოჯანმრთელდა.
სწორედ პაციენტი #5 გახდა NCDC-ს დირექტორის შვილისა და სამედიცინო კორპორაცია "ევექსის" თანამშრომლის ნიკოლოზ გამყრელიძის ინფიცირების წყარო, როდესაც იტალიიდან დაბრუნებული თათბირზე მივიდა. ნიკოლოზ გამყრელიძე ამბობდა, რომ პაციენტ #5-ს სტრესი ჰქონდა და მომხდარში თავს იდანაშაულებდა. მისი აზრით, ნაწილობრივ ამანაც განაპირობა ის, რომ დიდი ხანი ვერ გამოჯანმრთელდა.