საქართველოს მთავრობამ დაიწყო იმ შეზღუდვების ეტაპობრივად მოხსნა, რომლებიც კორონავირუსი COVID-19-ის გავრცელების საფრთხის გამო დაწესდა.
ერთ-ერთი პირველი ნაბიჯი ქალაქებს შორის მსუბუქი ავტოტრანსპორტით გადაადგილების ორი დღით დაშვება და თბილისის შიგნით მსუბუქი ავტომობილებით გადაადგილების აკრძალვის გაუქმება გახდა.
ამ დროის განმავლობაში საქართველოში კორონავირუსით ინფიცირებულთა რაოდენობამ 496-ს მიაღწია. გამოჯანმრთელდა 149 ადამიანი, ექვსი პაციენტი გარდაიცვალა. სამი პაციენტი ჩამოიყვანეს თურქეთიდან და სომხეთიდან, სადაც მათ კორონავირუსი დაუდგინათ. კარანტინში რჩება 4 833 ადამიანი, 571 იმყოფება სტაციონარებში.
საგანგებო მდგომარეობა ქვეყანაში 22 მაისამდე გახანგრძლივდა. რიგი შეზღუდვები კვლავ მოქმედებს, გამოცხადებულია საკომენდანტო საათი 21:00-დან 06:00 საათამდე.