თბილისი, 22 აპრილი - Sputnik. კომპანიებს, რომლებსაც შეჩერებული აქვთ საქმიანობა, დასუფთავების მოსაკრებელი არ დაერიცხებათ, განაცხადა დედაქალაქის მერმა კახა კალაძემ.
როგორც კახა კალაძემ ვიდეომიმართვაში აღნიშნა, იმ ვითარების გამო, რაც დღეს ქვეყანაშია, მეწარმეების დიდმა ნაწილმა შეაჩერა საქმიანობა.
„მერიის საწარმომ „თბილსერვის ჯგუფმა“ აღრიცხა ასეთი სუბიექტები. ჩვენ ამ დღეების განმავლობაში ყველა კომპანია გვყავს აღწერილი, რომელთაც შეჩერებული აქვთ დროებით თავიანთი სამუშაოების განხორციელება. მივიღეთ გადაწყვეტილება, რომ ამ კომპანიებს არ დაერიცხოთ დასუფთავების მოსაკრებელი იმ პერიოდზე, რა დროსაც შეჩერებულია მათ საქმიანობა“, – განაცხადა კახა კალაძემ.
თბილისის მერის თქმით, ეს ხელს შეუწყობს ბიზნეს-სექტორის იმ წარმომადგენლებს, რომლებსაც გარკვეული პრობლემები შეექმნათ და ვერ ახორციელებენ საქმიანობას.
ბოლო მონაცემებით, საქართველოში COVID-19-ით ინფიცირებულთა რაოდენობამ 411-ს მიაღწია, გამოჯანმრთელდა 98, გარდაიცვალა 5. კარანტინში იმყოფება 5160 ადამიანი, სტაციონარებში მეთვალყურეობის ქვეშ 579 პაციენტია.