თბილისი, 8 აპრილი — Sputnik. საქართველოში კორონავირუსული ინფექციისგან გამოჯანმრთელებულთა რიცხვი 50-მდე გაიზარდა, ნათქვამია საგანგებოდ შექმნილ ვებ-გვერდზე StopCov.
აღსანიშნავია, რომ გამოჯანმრთელებული ორი პაციენტი კორონავირუსისგან თბილისის ინფექციურ საავადმყოფოში მკურნალობდა. საავადმყოფოს სამედიცინო დირექტორის მარინა ეზუგბაიას თქმით, ეს საავადმყოფოში გამოჯანმრთელების უკვე 37-ე შემთხვევაა. აღსანიშნავია, რომ კლინიკაში კიდევ 5 პაციენტის ტესტის პასუხს ელოდებიან.
ამ დროის მონაცემებით, საქართველოში COVID-19-ით ინფიცირებულთა რაოდენობამ 208-ს მიაღწია, გარდაიცვალა 3.
კარანტინში იმყოფება 4682 ადამიანი, სტაციონარებში მეთვალყურეობის ქვეშ 375 პაციენტია.
კორონავირუსის პანდემიასთან დაკავშირებით საქართველოში 21 მარტს საგანგებო მდგომარეობა გამოცხადდა და ის 21 აპრილამდე გაგრძელდება. 31 მარტიდან კი ქვეყნის მთელ ტერიტორიაზე კარანტინის რეჟიმი მოქმედებს. შემოღებულია ასევე კომენდანტის საათი 21:00 საათიდან დილის 06:00 საათამდე.