თბილისი, 1 აპრილი — Sputnik. კორონავირუსული ინფექციით გარდაცვლილთა დაკრძალვის ალგორითმის თანახმად, ცხედრების ნათესავებისთვის გადაცემა ან მათი გაკვეთა აკრძალულია, აცხადებს ყაზახეთის მთავარი სანიტარული ექიმი აიჯან ესმაგამბეტოვა.
„ალგორითმის თანახმად, სხეულის გაკვეთა და ნათესავებისთვის მისი გადაცემა აკრძალულია. დაიშვება მხოლოდ ახლო ნათესავების დამშვიდობება მინიმუმ სამი მეტრის დაშორებით. ამასთან, გარდაცვლილის ცხედარი არ უნდა დარჩეს გამოსამშვიდობებელ ადგილზე ერთ საათზე მეტხანს“, — განაცხადა ესმაგამბეტოვამ პრესკონფერენციაზე.
მისი თქმით, რიტუალურ ცერემონიაში მხოლოდ ერთი სასულიერო პირი მიიღებს მონაწილეობას ისე, რომ არც მას და არც ნათესავებს „გარდაცვლილის სხეულთან კონტაქტი არ ექნებათ“.
ამ დროისათვის ყაზახეთში კორონავირუსით ინფიცირების 369 შემთხვევაა დადასტურებული, აქედან სამი პაციენტი გარდაიცვალა, 26 კი განიკურნა.