თბილისი, 24 მარტი — Sputnik. ახალი კორონავირუსით ინფიცირებულ, კრიტიკულ მდგომარეობაში მყოფ ავადმყოფზე აშშ-ში დამზადებული ექსპერიმენტული პრეპარატის გამოცდა დაიწყეს, განუცხადა მასმედიას ჩეხეთის ჯანდაცვის მინისტრმა ადამ ვოიტეხმა.
გავრცელებული ინფორმაციით, საუბარია ჩეხეთის სპეციალიზებულ საავადმყოფო Na Bulovce-ში მოთავსებულ მძიმე ავადმყოფზე, რომელსაც პრეპარატი Remdesivir-ი დღეს მისცეს პირველად.
„პაციენტს სამშაბათს დავუწყეთ პრეპარატის მიცემა. იმედი გვაქვს, რომ ის დაგვეხმარება დაავადების განკურნებაში“, — განაცხადა მინისტრმა.
მისი თქმით, აღნიშნული პაციენტი მიერთებულია აპარატთან, რომელიც სისხლის ცირკულაციას ახდენს მისი სხეულის გარეთ.
აღსანიშნავია, რომ პრეპარატი სპეციალურად ამ ინფიცირებულისთვის შეუკვეთეს აშშ-ში, სადაც ამ დროისთვის ასევე მიმდინარეობს მისი პრაქტიკული გამოცდა COVID-19-ით ინფიცირებულების სამკურნალოდ.
COVID 19-ით გამოწვეული სიკვდილიანობა სხვა ეპიდემიებთან შედარებით: თვალსაჩინო გრაფიკა>>
გავრცელებული ინფორმაციით, Remdesivir-ი ჩეხ მედიკოსებს მისმა უშუალო შემქმნელმა, ფარმაცევტულმა კომპანია Gilead Sciences-მა მიაწოდა, რომლის მკვლევართა ჯგუფს ეროვნებით ჩეხი ტომას ციგლარჟი ხელმძღვანელობს.
ჯონ ჰოპკინსის უნივერსიტეტის სპეციალური პროექტის ინფორმაციით, ამ დროისათვის ჩეხეთში COVID-19-ით ინფიცირებულთა რაოდენობა 1 289 კაცს აღწევს. აქედან გარდაცვლილია 2 და განკურნებულია 8 ადამიანი.