საქართველოში სულ უფრო მეტ ორგანიზაციას შეაქვს კორექტივები მუშაობაში, რათა შეზღუდონ კონტაქტები და თავიდან აირიდონ ინფიცირება. ამასთან, ქუჩებში სულ უფრო მეტი ადამიანი დადის ნიღბით, რათა კორონავირუსისგან თავი დაიცვან.
ჯანდაცვის მსოფლიო ორგანიზაციის რეკომენდაციით, უპირველესად ხშირად და თითო ჯერზე დაახლოებით 20 წამის განმავლობაში მაინც უნდა იბანოთ ხელები, ვინაიდან ვირუსი ინფიცირებულ ზედაპირთან შეხებით გადადის. ამასთან ჯანმო აღნიშნავს, რომ ფულის კუპიურებიდან ვირუსის გადადების შანსი უკიდურესად მცირეა.
ნიღბის ტარება ადამიანის სურვილზეა დამოკიდებული, თუმცა ამ შემთხვევაშიც გარკვეული წესების დაცვაა საჭირო: ნიღაბი ხშირად უნდა გამოიცვალოთ, ოღონდ ამ დროს თასმებზე უნდა მოკიდოთ ხელი ფრთხილად და არა პირდაპირ დამცავ ზედაპირს, სადაც ასევე შეიძლება არსებობდეს ვირუსი. ჩვეულებრივი სამედიცინო ნიღაბი უნდა გამოიცვალოთ ერთი, ან მაქსიმუმ ორი საათის შემდეგ და ხელმეორედ აღარ გამოიყენოთ.
ქუჩაში ნიღბით სიარული ეფექტური არ არის, ვინაიდან ვირუსი დაახლოებით ნახევარი მეტრის მანძილზე შეიძლება გადაეცეს. ამიტომ თავი უნდა შეიკავოთ შეხვედრისას ხელის ჩამორთმევის, გადაკოცნისა თუ ჩახუტებისგან. ნიღბის ტარება რეკომენდებულია დახურულ შენობაში ან ტრანსპორტში, რათა თავიდან აიცილოთ ვირუსის შესუნთქვა ცხვირით ან პირით.