თბილისი, 2 მარტი — Sputnik. კომპანია „თბილსერვის ჯგუფმა" გვიან ღამით თბილისის 54 მიწისქვეშა გადასასვლელში სადეზინფექციო სამუშაოები ჩაატარა, იუწყება დედაქალაქის მერიის პრეს-სამსახური.
დეზინფექცია მერის განკარგულებით კორონავირუსის პროფილაქტიკის მიზნით ტარდება. სამუშაოები ანტისეპტიკური ხსნარების გამოყენებით მიმდინარეობს.
„თბილსერვის ჯგუფის" ხელმძღვანელმა რომეო მიქაუტაძემ განაცხადა, რომ მიწისქვეშა გადასასვლელების დეზინფექცია უახლოეს დღეებში საჭიროებისამებრ ჩატარდება.
გუშინ თბილისში საზოგადოებრივი ტრანსპორტის, სკოლებისა და საბავშვო ბაღების მასშტაბური სადეზინფექციო სამუშაოები დაიწყო. სკოლების დეზინფექციისთვის ათამდე სხვადასხვა საშუალება გამოიყენება.
უწყებათაშორისო საკოორდინაციო საბჭოს გადაწყვეტილებით 29 თებერვალს საქართველოს სახელმწიფო სკოლებში სადეზინფექციო სამუშაოების ჩატარებისთვის არდადეგები ერთი კვირით ადრე - 2 მარტიდან გამოცხადდა. ამ პერიოდში ინტენსიური დეზინფექცია საქართველოს ყველა სახელმწიფო სკოლაში ჩატარდება.
COVID 2019: დაფიქსირდა ყველაზე დაბალი მაჩვენებელი ბოლო 40 დღის განმავლობაში>>
ამ დროისთვის საქართველოში კორონავირუსით დაინფიცირების სამი შემთხვევა გამოვლინდა. აქედან ორი მამაკაცი ირანიდან ჩამოვიდა, ხოლო ერთი ქალი - იტალიიდან.