თბილისი, 24 თებერვალი — Sputnik. ახალი ტიპის კორონავირუსით დაავადების შემთხვევები ჰუბეის პროვინციის გარეთ მცირდება, იუწყება ჩინეთის ჯანდაცვის საკითხთა სახელმწიფო კომიტეტი.
გავრცელებული ინფორმაციით, გასული დღე-ღამის განმავლობაში მთლიანად ჩინეთში კორონავირუსით ინფიცირების 409 შემთხვევა გამოვლინდა; აქედან 11 — ჰუბეის ფარგლებს გარეთ, დანარჩენი 398 კი – დაავადების ეპიცენტრად ქცეულ პროვინციაში.
აღსანიშნავია, რომ ქვეყნის ექვს პროვინციაში ხელისუფლებამ საგანგებო ვითარებაზე რეაგირების უმაღლესი I დონე დასწია — ზოგ მათგანში მეორე, ხოლო ზოგში – მესამე დონემდე.
ამ დროისათვის არსებული მონაცემებით, მატერიკულ ჩინეთში COVID-2019-ით ინფიცირებულთა მთლიანი რაოდენობა 77 150 კაცს შეადგენს. აქედან ამ დროისათვის ავადაა 49 824 ადამიანი, მათ შორის 9 915 კაცი მძიმე მდგომარეობაშია. გამოჯანმრთელდა და საავადმყოფოებიდან გაეწერა 24 734 პაციენტი, გარდაიცვალა 2592. გარდა ამისა, ექიმები აკვირდებიან 97 ათას ადამიანს, რომლებსაც დაავადებულებთან მჭიდრო კონტაქტი ჰქონდათ.