თბილისი, 19 თებერვალი — Sputnik. ცნობილი კუვეიტელი ბლოგერი და საზოგადო მოღვაწე სალვა ალ-მატირი მილიარდ კუვეიტურ დინარს (3,2 მლრდ აშშ დოლარზე მეტი) ითხოვს მეთოდისთვის, რომელიც მან თითქოს ახალი ტიპის კორონავირუსის, COVID 2019-ის სამკურნალოდ შექმნა. ამის შესახებ ალ-მატირი სოციალურ ქსელ Snapchat-ში წერს.
„ახლა ჩინეთის საელჩოსთან ვარ. მოვედი, რათა წარმოვადგინო ჩანაწერები კორონავირუსის მკურნალობის მეთოდების შესახებ“, — დაწერა ალ-მატირიმ.
სანამ ჩინეთის საელჩოსთან მივიდოდა, ბლოგერმა Youtube-ს არხზე განათავსა ვიდეოჩანაწერი, რომელშიც ითხოვს, რომ მის საბანკო ანგარიშზე მილიარდი კუვეიტური დინარი ჩარიცხონ. სანაცვლოდ ის კორონავირუსის მკურნალობის მეთოდის გამჟღავნების პირობას დებს. აღნიშნულ ვიდეოჩანაწერს მომხმარებელთა კომენტარების ქარიშხალი მოჰყვა.
როგორც ირკვევა, კუვეიტელი აქტივისტი ასე გამოეხმაურა მსახიობ ჯეკი ჩანის წინადადებას, რომ ის მილიონ იუანს (143 ათასი აშშ დოლარი) გადაუხდის ადამიანს, რომელიც კორონავირუსის წამალს მიაგნებს.
COVID-2019 ჰონგ-კონგში: დეფიციტის შიშით მძარცველებმა 600 ცალი ტუალეტის ქაღალდი მოიპარეს
ჩინეთის ჯანდაცვის სახელმწიფო კომიტეტი კი ავრცელებს ბოლო მონაცემებს COVID 2019-თან დაკავშირებით. ამ დროისათვის მატერიკულ ჩინეთში კორონავირუსით ინფიცირებულთა საერთო რაოდენობა 74 185 ადამიანს შეადგენს, აქედან ავადაა 57 805. მათგან მძიმე მდგომარეობაშია 11 977 კაცი. გარდაიცვალა 2004 ადამიანი, ხოლო 14 376 პაციენტი გამოჯანმრთელდა და გაეწერა საავადმყოფოებიდან.
ამასთან, ექიმები აკვირდებიან დაახლოებით 135 800 ადამიანს, რომლებსაც მჭიდრო კონტაქტი ჰქონდათ კორონავირუსით ინფიცირებულებთან.