თბილისი, 9 თებერვალი – Sputnik. ტაილანდში სპეცოპერაციის დროს ლიკვიდირებულია ჯარისკაცი, რომელმაც სროლა ატეხა, იუწყება РИА Новости.
ტაილანდის ჩრდილო-აღმოსავლეთში ქალაქ ნაკჰონრატჩასიმას სავაჭრო ცენტრში ტაილანდის სახმელეთო არმიის სერჟანტმა სროლა ატეხა. მამაკაცი თავის ნაწილში იყო სროლის ინსტრუქტორი და სნაიპერი, რომელმაც მომზადება სპეცდანიშნულების ძალების პროგრამით გაიარა.
ქვეყნის პრემიერ-მინისტრ პრაიუტ ჩან-ოჩას თქმით, ტაილანდში სავაჭრო ცენტრზე სამხედრო პირის თავდასხმის შედეგად დაიღუპა 27 და დაიჭრა 51 ადამიანი.
მსროლელის ლიკვიდაციის სპეცოპერაცია 12 საათს გაგრძელდა. გაქცევის მცდელობისას მამაკაცმა დაჭრა სპეცნაზის ორი თანამშრომელი, ერთ-ერთი მათგანი მოგვიანებით გარდაიცვალა.
დანაშაულის მოტივი ჯერჯერობით უცნობია. თუმცა სამხედრო მოსამსახურემ სოციალურ ქსელებში რამდენიმე ფოტო და ვიდეო ატვირთა და ერთ-ერთ ჩანაწერზე ის ამბობს, რომ დაიღალა.