თბილისი, 22 იანვარი — Sputnik. უზბეკეთის ცენტრალური ბანკის საბანკო მეთვალყურეობის კომიტეტმა ქართულ TBC Bank-ს („თიბისი ბანკი") ტაშკენტში ბანკის გახსნაზე წინასწარი ნებართვა მისცა, იუწყება „Sputnik-უზბეკეთი".
„წინასწარი ნებართვა ბანკის შექმნაზე ექვს თვემდე ვადით გაიცემა. ამ პერიოდის განმავლობაში დამფუძნებლებმა შესაბამისი საორგანიზაციო-ტექნიკური ზომები უნდა მიიღონ და ჩამოაყალიბონ ბანკის საწესდებო კაპიტალი საბანკო საქმიანობის განხორციელებაზე ლიცენზიის მისაღებად", – განმარტავენ უზბეკეთის ცენტრალურ ბანკში.
TBC Bank-ის გეგმებზე უზბეკეთის ბაზარზე თავისი ციფრული ნეობანკით Space გასვლასთან დაკავშირებით გასული წლის იანვარში გახდა ცნობილი.
2019 წლის აპრილში TBC Bank-მა კომპანია Inspired-ის აქციების 51% შეისყიდა, რომელიც უზბეკეთში წამყვან საგადასახადო სისტემას წარმოადგენს და მუშაობს ბრენდით Payme, ხოლო ნოემბერში ოფიციალურად მიმართა უზბეკეთის შესაბამის უწყებას ქვეყნის ტერიტორიაზე საბანკო ლიცენზიის მისაღებად.
სავარაუდოდ, Payme-ს შესყიდვა ბანკს საშუალებას მისცემს, მომხმარებლების საერთო რაოდენობა 3,7 მილიონ ადამიანამდე გაზარდოს.
ამჟამად ТBC Bank Group უზბეკეთში ციფრულ მომსახურებას აქტიურად ნერგავს – აფართოებს Payme-ს მომსახურებათა ჩამონათვალს, აამოქმედა ბილეთების გაყიდვის ონლაინ-სერვისი, ქმნის სავაჭრო პლატფორმას Vendoo, მუშაობს ციფრული ბანკის შექმნაზე.
უზბეკეთის ანტიმონოპოლიური კომიტეტის შეფასებით, ქართული ბანკის მიერ საგადასახადო სისტემის ყიდვა ქვეყნის უმსხვილესი გარიგებების ხუთეულში მოხვდა.
TBC Bank-ი 1992 წელს დაფუძნდა. TBC Bank Group PLC ლონდონში 2017 წელს შეიქმნა, მისი აქციები ლონდონის საფონდო ბირჟის პრემიუმ-სეგმენტის ლისტინგში გავიდა.
ანგარიშის მიხედვით, ბანკის აქტივებმა, 2018 წლის 31 დეკემბრის მდგომარეობით, 15 მილიარდ ლარს გადააჭარბა, რაც საქართველოს საბანკო სისტემის საერთო მოცულობის 38,2%-ია. TBC Bank-ზე მოდის ქვეყანაში საბანკო სისტემის კრედიტების საერთო მოცულობის 38,8% და საბანკო დეპოზიტების საერთო მოცულობის 41,2%.