თბილისი, 22 იანვარი — Sputnik. ტრაგიკულად დაღუპული 14 წლის ლენო გვარჯალაძის მამა, მუსიკოსი გიორგი გვარჯალაძე სოციალურ ქსელში საკუთარი 11 წლის შვილის „ფეისბუქიდან“ „სქრინებს“ აქვეყნებს, სადაც უცნობი ადამიანი მის ქალიშვილს ინტიმურ ურთიერთობაზე ესაუბრება.
ტრაგიკული შემთხვევა, რომელსაც 14 წლის ლენო გვარჯალაძე ემსხვერპლა, თბილისში 2019 წლის ივნისში მოხდა. მე-9 კლასელი გოგონა კორპუსის მე-7 სართულის ფანჯრიდან გადავარდა და ადგილზე გარდაიცვალა. ლენო (ელენე) გვარჯალაძე ცნობილი ტელეწამყვანის ლულუ კახიანის და პროდიუსერისა და კომპოზიტორის გიორგი გვარჯალაძის შვილი იყო.
14 წლის ლენო აპრილში თბილისში მომხდარი ავარიის დროს დაღუპულ ნიკა ჯორჯაძესთან და ბექა (ბიკი) ჭიღიტაშვილთან (ეს უკანასკნელი ავარიიდან ერთ თვეში, საავადმყოფოში გარდაიცვალა) მეგობრობდა. ბოლო პოსტი, რომელიც ლენო გვარჯალაძემ სოციალურ ქსელში გამოაქვეყნა, გარდაცვლილ მეგობარს ეძღვნებოდა:
„ტკივილი. მწარე ტკივილი. შიგნიდან მწვავს. ყველაზე მეტად მიყვარხართ. ყოველთვის მეყვარებით. დამელოდეთ. არსად წახვიდეთ. მოვა დრო და ორივეს ისევ ჩაგეხუტებით. ისევ ვივლით და დავიწყებთ რაღაცეების გაფუჭებას. მენატრებით. მაძუგები forever“.
გოგონას გარდაცვალების ფაქტზე შინაგან საქმეთა სამინისტრომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.