თბილისი, 16 იანვარი – Sputnik. ქობულეთში, „სოკარ ჯორჯია გაზის“ ოფისში მძარცველები შეიჭრნენ და სწრაფი ჩარიცხვის აპარატიდან თანხის გატანა სცადეს, იუწყება აჭარის ტელევიზია.
შემთხვევა ქობულეთში, აღმაშენებლის ქუჩაზე დღეს, გამთენიისას მოხდა. გავრცელებული ინფორმაციით, თავდამსხმელებმა დაცვის თანამშრომელი გაკოჭეს და ჩარიცხვის აპარატი გატეხეს, თუმცა თანხის წაღება ვერ შეძლეს.
ამ ეტაპზე დაკავებული არავინაა.
შინაგან საქმეთა სამინისტროს ინფორმაციით, მომხდარზე გამოძიება საქართველოს სსკ-ის 179-ე მუხლით დაიწყო, რაც ყაჩაღობას გულისხმობს და ისჯება თავისუფლების აღკვეთით ვადით ხუთიდან შვიდ წლამდე.