თბილისი, 13 იანვარი — Sputnik. ღამის კლუბ „ბასიანთან" სროლისას სამი დაშავებულიდან ერთი საავადმყოფოდან გაწერეს.
შაბათს, ღამით კლუბ „ბასიანთან" მამაკაცმა სროლა დაიწყო მას შემდეგ, რაც ის ღამის კლუბში არ შეუშვეს. ინციდენტის შედეგად დაშავდა ერთი ქალი და ორი მამაკაცი.
ორ დაჭრილს გუშინ ოპერაცია ჩაუტარდა და ისინი ალადაშვილის სახელობის კლინიკაში განაგრძობენ მკურნალობას.
ეჭვმიტანილი ცხელ კვალზე საკუთარ სახლთან დააკავეს. პირადი ჩხრეკისას მას აღმოაჩნდა ცეცხლსასროლი იარაღი, 23 ვაზნა და 6 დანა.
პირველი არხის ინფორმაციით, დაკავებულს ბრალს დღეს წარუდგენენ. მან ადვოკატზე უარი განაცხადა.
გამოძიება მიმდინარეობს ორი ან მეტი ადამიანის განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვისა და ტარების მუხლებით. დანაშაული ითვალისწინებს 16-დან 20 წლამდე ან უვადო პატიმრობას.