თბილისი, 2 იანვარი - Sputnik. ათენის გარეუბანში ძარცვის მცდელობის დროს მიღებული ტრავმისგან საქართველოს მოქალაქე გარდაიცვალა, იუწყება საზოგადოებრივი მაუწყებლის პირველი არხი ბერძნულ მედიაზე დაყრდნობით.
გავრცელებული ინფორმაციით, შემთხვევა 2019 წლის 31 დეკემბერს, ადგილობრივი დროით 23:00 საათისთვის მოხდა. ორი მძარცველი ამბელოკიპის უბანში მდებარე ერთ-ერთ ბინაში შეიჭრა, თუმცა ისინი მეზობლებმა შენიშნეს და სამართალდამცველები გამოიძახეს.
ბერძნული მედიის ცნობით, პოლიციისგან თავის დაღწევის მცდელობისას, ერთ-ერთი მძარცველი ბინის დატოვებას ფანჯრიდან შეეცადა, თუმცა მინის ჩამსხვრევის დროს მას ქვედა კიდურის არტერია დაუზიანდა.
დაშავებული და მისი თანამზრახველი პოლიციამ დააკავა და საავადმყოფოში გადაიყვანა. თუმცა, დაშავებულის გადარჩენა ვერ მოხერხდა.