თბილისი, 30 დეკემბერი — Sputnik. აშშ-ის ყოფილმა ვიცე-პრეზიდენტმა ჯოზეფ ბაიდენმა უარი განაცხადა ჩვენების მიცემაზე პრეზიდენტ დონალდ ტრამპის იმპიჩმენტის პროცედურის ფარგლებში. ამის თაობაზე ბაიდენმა საკუთარ Twitter-აკაუნტზე დაწერა.
„არ ვაპირებ ისე წარმოვაჩინო, თითქოს რესპუბლიკელებს რაიმე სახის სამართლებრივი საფუძვლები გააჩნიათ იმპიჩმენტის საქმესთან დაკავშირებით ჩემი ჩვენებების მისაღებად... ეს ტრამპის იმპიჩმენტია და არა ჩემი“, — დაწერა ბაიდენმა.
ყოფილმა ვიცე-პრეზიდენტმა აღნიშნა, რომ უკრაინასთან დაკავშირებით ჩვენება თეთრმა სახლმა უნდა მისცეს და არა მან.
მანამდე ბაიდენმა განაცხადა, რომ არ მისცემდა ჩვენებას ტრამპის წინააღმდეგ იმ შემთხვევაშიც კი, თუ აშშ-ის კონგრესის სენატი მას შესაბამის შეტყობინებას გაუგზავნიდა. ამასთან მან განმარტა, რომ კანონმდებლების მხრიდან მსგავსი მოთხოვნა „ზედმეტად თვალთმაქცური“ იქნებოდა.
აშშ-ის კონგრესის წარმომადგენელთა პალატამ დონალდ ტრამპის იმპიჩმენტის პროცედურა 25 სექტემბერს წამოიწყო. ამის მიზეზად იქცა ამერიკის პრეზიდენტის სატელეფონო საუბარი უკრაინის ლიდერ ვლადიმირ ზელენსკისთან. დემოკრატიული პარტიის ლიდერებს სურთ დაამტკიცონ, რომ აშშ-ის პრეზიდენტი ზეწოლას ახდენდა უკრაინელ კოლეგაზე, რათა მას სტიმული მიეცა ჯო ბაიდენის ვაჟის წინააღმდეგ კორუფციული საქმის გამოძიებისთვის.
აღსანიშნავია, რომ ბაიდენს ტრამპის ყველაზე პერსპექტიულ ოპონენტად მიიჩნევენ 2020 წლის საპრეზიდენტო არჩევნებში.