თბილისი, 14 დეკემბერი — Sputnik. საქართველო წარმატებით ვაჭრობს - საგარეო სავაჭრო ბრუნვა 2019 წლის დასაწყისიდან 2018 წლის ამავე პერიოდთან შედარებით, 1,4%-ით გაიზარდა და დაახლოებით 11,5 მილიარდი აშშ დოლარი შეადგინა (არაორგანიზებული ვაჭრობის გარეშე), აღნიშნულია ქვეყნის სტატისტიკის ეროვნული სამსახურის „საქსტატის" მასალებში.
ქართული პროდუქციის ექსპორტმა 2019 წლის იანვრიდან ნოემბრამდე შეადგინა დაახლოებით 3,4 მილიარდი აშშ დოლარი - 11,4%-ით მეტი, ვიდრე გასულ წელს.
ამავე დროს, იმპორტი შემცირდა 2,3%-ით და 8,1 მილიარდ დოლარზე მეტი შეადგინა.
საქართველოს საგარეო სავაჭრო ბრუნვის 2019 წლის იანვრის-ნოემბრის მონაცემები
| მაჩვენებელი | მოცულობა, მლნ დოლარი | ზრდა, % |
| ექსპორტი | 3 381,4 | 11,7 |
| იმპორტი | 8 122,6 | -2,3 |
| სულ | 11 504,1 | 1,4 |
ეკონომიკისა და მდგრადი განვითარების სამინისტრო ექსპორტის ზრდას რამდენიმე ფაქტორით ხსნის, მათ შორის სავაჭრო ბაზრების გეოგრაფიის გაფართოებით.
კერძოდ, საქართველოს მთავრობა აქტიურად მუშაობს ექსპორტის შემდგომი ზრდისა და დივერსიფიკაციის საკითხებზე. თავისუფალი ვაჭრობის სფეროში გაფორმებული ახალი ხელშეკრულებები ხელს უწყობს ქართული პროდუქციის გაყიდვების ბაზრების გაფართოებას, საექსპორტო პროდუქტების დივერსიფიკაციას და ქმნის ექსპორტის პოტენციალის დამატებითი ზრდის შესაძლებლობას.
გასაღების ბაზრები
საქართველო წარმატებით ვაჭრობს მეზობლებთან - წლიდან წლამდე ლიდერები არიან თურქეთი, რუსეთი და აზერბაიჯანი, ასევე ევროკავშირისა და დსთ-ს ქვეყნები. ბოლო ათი თვის მონაცემები ამ ქვეყნებთან ექსპორტისა და იმპორტის შესახებ „საქსტატს“ ჯერ არ გაუვრცელებია.
საქართველომ უკვე მოაწერა ხელი შეთანხმებას თავისუფალი ვაჭრობის შესახებ ევროკავშირთან, ევროპის თავისუფალი ვაჭრობის ასოციაციასთან (EFTA), თურქეთთან და ჩინეთთან და ჰონგ-კონგთან, ასევე ახორციელებს თავისუფალი ვაჭრობის შესახებ მოლაპარაკებებს იაპონიასთან და აშშ-თან. ახლო მომავალში მოლაპარაკება დაიწყება ინდოეთთან.