თბილისი, 29 ნოემბერი — Sputnik. პარტიის „ევროპული საქართველო - მოძრაობა თავისუფლებისთვის" ერთ-ერთი ლიდერი, თბილისის ყოფილი მერი გიგი უგულავა, რომელიც ეროვნულ ბიბლიოთეკასთან აქციაში მონაწილეობდა, პოლიციის ავტომობილში ჩასვეს და ტერიტორიიდან გაიყვანეს.
უგულავას გარდა პოლიციამ აქციიდან გაიყვანა ასევე პარლამენტის დეპუტატები „ევროპული საქართველოდან" გიორგი კანდელაკი და ირაკლი აბესაძე, მათთან ერთად ასევე რამდენიმე აქტივისტი.
შსს ჯერჯერობით კომენტარს არ აკეთებს – ისინი დააკავეს თუ საპროტესტო აქციაზე ვითარების დაძაბვის თავიდან არიდების გამო ტერიტორიიდან გაიყვანეს.
თბილისში დილიდან რამდენიმე ათეულმა ადამიანმა პარლამენტის შენობასთან მოიყარა თავი. მოგვიანებით დემონსტრანტები ოპოზიციონერი პოლიტიკოსების ლიდერობით ეროვნული ბიბლიოთეკის შენობისკენ გაემართნენ, სადაც მთავრობის ვიცე-პრემიერი, იუსტიციის მინისტრი თეა წულუკიანი იმყოფება და სადაც ამჟამად მიტინგი მიმდინარეობს.