თბილისი, 28 ნოემბერი — Sputnik. აზერბაიჯანის მმართველმა პარტია „ენი აზერბაიჯანმა“ პოლიტსაბჭოს დღევანდელ სხდომაზე წამოაყენა ინიციატივა, რომლის თანახმადაც, ისინი ქვეყნის პრეზიდენტს პარლამენტის დათხოვნის წინადადებით მიმართავენ, იუწყება „Sputnik–აზერბაიჯანი“.
აღსანიშნავია, რომ პარტია „ენი აზერბაიჯანს“ მილი მეჯლისში უმრავლესობა ეკუთვნის.
პარტიამ აღნიშნული გადაწყვეტილება იმის გამო მიიღო, რომ, მათი აზრით, საკანონმდებლო ორგანოს ამჟამინდელი შემადგენლობა არ შეესაბამება ქვეყანაში რეალიზებულ პოლიტიკას.
მოსალოდნელია, რომ მმართველი პარტია უახლოეს დღეებში გამართავს თათბირს საკუთარ გადაწყვეტილებასთან დაკავშირებით და მისი პრეზიდენტ ილჰამ ალიევისთვის წარდგენის შესახებ.
აზერბაიჯანში წინა საპარლამენტო არჩევნები 2015 წელს ჩატარდა, რა დროსაც „ენი აზერბაიჯანმა“ 125 მანდატიდან 71 მიიღო. მომდევნო არჩევნები, წესით, 2020 წლის 1 ნოემბერს უნდა გაიმართოს.