თბილისი, 22 ნოემბერი — Sputnik. ორი ახალგაზრდა დაიღუპა და ერთი დაშავდა ადიგენში ავარიის დროს, იუწყება საინფორმაციო სააგენტო „სამხრეთის კარიბჭე".
შემთხვევა ადიგენის მუნიციპალიტეტის სოფელ ფარეხასთან დღეს, გამთენიისას მოხდა.
გავრცელებული ინფორმაციით, 24 წლის ახალგაზრდები ახალციხიდან ადიგენის მიმართულებით მსუბუქი ავტომობილით მოძრაობდნენ, როდესაც ავტომანქანა სავალი გზიდან გადავიდა და რამდენჯერმე ამოტრიალდა.
დაშავებული ახალციხის რეფერალურ საავადმყოფოში გადაიყვანეს.
როგორც ექიმები ამბობენ, დაზარალებულს ხერხემალი აქვს დაზიანებული.
ადგილზე მობილიზებული იყვნენ სამაშველო სამსახურის, სასწრაფო დახმარებისა და საპატრულო პოლიციის ეკიპაჟები.
მომხდარ ფაქტზე გამოძიება სსკ-ის 276-ე მუხლის მერვე ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც ორი ან მეტი ადამიანის სიცოცხლის მოსპობა გამოიწვია.