თბილისი, 9 ნოემბერი — Sputnik. საინვესტიციო კომპანია Galt & Taggart მონეტარული პოლიტიკის განაკვეთის შემდგომი გაზრდის საჭიროებას ვერ ხედავს, ნათქვამია კომპანიის მიმოხილვაში.
საქართველოს ეკონომიკა: რა უწყობს ხელს ზრდას >>
ექვს თვეში ლარი დოლარის მიმართ 10%-ით გაუფასურდა. თუ 1 აპრილს ეროვნული ბანკის მიერ გამოცხადებული ლარის ოფიციალური კურსი დოლარის მიმართ შეადგენდა 2,7029 GEL/$1, 1 ოქტომბერს მან უკვე მიაღწია 2,9770 GEL/$1. შედეგად, წლიური ინფლაცია ოქტომბერში 6,9%-ს შეადგენდა.
ლარზე ზეწოლის შემსუბუქების მიზნით, ეროვნულმა ბანკმა ბოლო თვეებში გაყიდა 72,8 მილიონი აშშ დოლარი, გაზარდა მონეტარული პოლიტიკის განაკვეთი 6,5%-დან 8,5%-მდე და შეამცირა სარეზერვო მოთხოვნები უცხოურ ვალუტაში 5 პროცენტული პუნქტით, მაგრამ ლარი მეტწილად გაუფასურებულია.
„იმის გათვალისწინებით, რომ 2020 წლის მეორე კვარტალში, ინფლაცია, სავარაუდოდ, 3%-იან მიზნობრივ მაჩვენებელთან ახლოს იქნება, ჩვენ ვერ ვხედავთ მონეტარული პოლიტიკის განაკვეთის შემდგომი გაზრდის საჭიროებას“, - ნათქვამია მიმოხილვაში.
Galt & Taggart- ის შეფასებით, წლიური ინფლაცია სავარაუდოდ წლის ბოლომდე მაღალ, 7%-იან დონეზე დარჩება, ხოლო ფასების ზრდის შენელება მოსალოდნელია 2020 წლის მეორე კვარტლიდან. ეს, სავარაუდოდ, საშუალებას მისცემს ეროვნულ ბანკს 2020 წელს მონეტარული პოლიტიკის განაკვეთი 1-1,5 პროცენტული პუნქტით შეამციროს.
„მიუხედავად მონეტარული პოლიტიკის გამკაცრებისა, 2019 წლისთვის ჩვენ უცვლელად ვტოვებთ ეკონომიკური ზრდის პროგნოზს 4,5%-ის დონეზე, მაგრამ 2020 წელს ჩვენ ველოდებით ეკონომიკაზე ზეწოლის შენარჩუნებას”, - აღნიშნავენ კომპანიის ანალიტიკოსები.
კომპანია ელოდება, რომ 2020 წელს საგარეო მოთხოვნისა და ინვესტიციების ხარჯზე საქართველოს ეკონომიკა 4,7%-ით გაიზრდება. მიუხედავად ამისა, თუ ეროვნული ბანკის მონეტარული პოლიტიკის განაკვეთი არ შემცირდება და საპარლამენტო არჩევნები გააუარესებს ბიზნესის განწყობებს, 2020 წელს ზრდა, სავარაუდოდ, 4%-მდე შენელდება.
მეორეს მხრივ, Galt & Taggart-ის თვალსაზრისით, თუ რუსეთი გააუქმებს აკრძალვას პირდაპირ ფრენებზე, ეს დადებითად იმოქმედებს ეკონომიკურ ზრდაზე.