თბილისი, 30 ოქტომბერი — Sputnik. გორთან მომხდარი ავტოსაგზაო შემთხვევის შედეგად ორი ადამიანი დაიღუპა, ორი კი - დაშავდა, იუწყება ტელეკომპანია Rustavi2.
ავტოსაგზაო შემთხვევა გუშინ ღამით მოხდა.
გავრცელებული ინფორმაციით, ავტომობილი გორთან გზის სავალი ნაწილიდან გადავიდა და ბეტონის ჯებირს შეეჯახა.
ავარიისას გარდაცვლილი და დაშავებული მგზავრები ნათესავები არიან. დაშავებულები სასწრაფო-სამედიცინო დახმარების სამსახურის ბრიგადებმა კლინიკა „გორმედში" გადაიყვანეს.
ექიმების ინფორმაციით, ერთ პაციენტს ტვინის შერყევა და ნეკნების მოტეხილობა აღენიშნება, მეორეს კი - ტრავმული დაზიანებები.
მომხდარზე გამოძიება საქართველოს სსკ-ის 276-ე მუხლის მერვე ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია.