„მე ვარ მაია ასათიანი, ჩემი ქვეყნის რიგითი ჯარისკაცი და ჩვენ ვიწყებთ!“ – ასეთია განახლებული „პროფილის“ ახალი პრომო, რომელიც ტელეკომპანია „რუსთავი 2“-ზე კვლავ ყოველ ხუთშაბათს გავა ეთერში. პირველი გადაცემის ეთერი 3 ოქტომბერსაა დაგეგმილი.
მაია ასათიანი „პროფილის“ ახალ პრომოში განსხვავებული იმიჯით წარდგა მაყურებლის წინაშე – ის მთის მწვერვალზე დგას, სამხედრო ფორმა აცვია და თმაზე ნაწნავი აქვს. გადაცემის ახალ პრომოს უკვე მოჰყვა ტელემაყურებლის კომენტარები. მაია ასათიანს დაბრუნებას და ახალ სეზონს ულოცავენ და წარმატებას უსურვებენ.
ჟურნალისტის საავტორო გადაცემა გარკვეული პერიოდის მანძილზე ეთერში აღარ გადიოდა, როცა მაია ასათიანის და ირაკლი მახვილაძის 18 წლის ქალიშვილი ნუცა მახვილაძე პარიზის საავადმყოფოში ორი წლის წინ გარდაიცვალა. ნუცა მახვილაძე საფრანგეთში ამერიკულ უნივერსიტეტში პიარისა და მარკეტინგის ფაკულტეტზე სწავლობდა. მომხდარი ტრაგედიიდან მაია ასათიანი საკუთარ გადაცემას თვეების შემდეგ დაუბრუნდა.