ტელეკომპანია „რუსთავი 2“-დან კადრების წასვლის შემდეგ ტელეკომპანიის მთავარი გასართობი შოუების შემოქმედი ჯგუფი - „კომედი ჯგუფი“ გაიყო. ერთი ნაწილი, მათ შორის ვანო ჯავახიშვილი, ოთო ლომთაძე, თამუნა ლეკვეიშვილი, ვანო ფხაკაძე, თათია სულუაშვილი, ნიკა გრიგოლია, ილო ბეროშვილი და სხვა ცნობილი სახეები, სულ 13 ადამიანი, ნიკა გვარამიას „მთავარ არხზე“ გადაბარგდნენ.
გუნდის ნაწილი „რუსთავი 2“-ზე დარჩა - დარჩენილებს შორისაა ალეკო მალხაზიშვილი და მისი გუნდის კიდევ რამდენიმე წევრი, რომლებიც უკვე ახალი სეზონისთვის ემზადებიან. მალხაზიშვილის თქმით, „კომედიში“ სულ 50 ადამიანი იყო და მათგან 13-მა დატოვა ტელეკომპანია.
ახალი სეზონისთვის მზადება აქტიურად მიმდინარეობს „მთავარ არხზეც“, რომელიც ეთერში 9 სექტემბრიდან გავა.
მსახიობი თამუნა ლეკვეიშვილი „ფეისბუქის“ პირად გვერდზე აქვეყნებს ფოტოებს, თუ როგორ ემზადებიან მსახიობები ახალი გადაცემებისთვის. ფოტოებში ჩანან: ვასო ფხაკაძე, ნიკა გრიგოლია, დიტო კუპატაძე, პაროდისტები - ნიკა კაკაბაძე და ქართლოს ნატროშვილი, ვანო ჯავახიშვილი, თათია სულუაშვილი და სხვები.