თბილისი, 1 აგვისტო — Sputnik. ფეხბურთში 2014 წლის მსოფლიო ჩემპიონი გერმანიის ნაკრების შემადგენლობაში ანდრე შურლე საქართველოს ნაკრებისა და მოსკოვის „სპარტაკის" ნახევარმცველის ჯანო ანანიძის თანაგუნდელი გახდა.
28 წლის გერმანელი ფეხბურთელი „სპარტაკში“ ამ სეზონის დასრულებამდე იჯარის საფუძველზე ითამაშებს ტრანსფერის გამოსყიდვის შესაძლებლობით, აღნიშნულია მოსკოვური კლუბის განცხადებაში.
კარიერის განმავლობაში შურლე გამოდიოდა კლუბებში: „მაინცი", „ბაიერი", „ჩელსი", „ვოლფსბურგი", „ბორუსია". გასული სეზონი ნახევარმცველმა ლონდონის „ფულჰემში" გაატარა. გერმანიის ნაკრებში სპორტსმენმა 57 მატჩი ჩაატარა და 22 გოლი გაიტანა.
რაც შეეხება ჯანო ანანიძეს, ქართველი ფეხბურთელი „სპარტაკში" უკვე ათი წელია გამოდის. მან ამ კლუბის შემადგენლობაში ჩაატარა 138 მატჩი ყველა ტურნირზე, გაიტანა 16 გოლი და გააკეთა ამდენივე საგოლე გადაცემა.
რუსეთის პრემიერ-ლიგაში „სპარტაკი" სამი ტურის შემდეგ მე-10 ადგილზეა და აქტივში ოთხი გოლი აქვს.