ცნობილი ქართველი დიზაინერი ანუკი არეშიძე ოთხ შვილთან ერთად ანანურში ისვენებს. როგორც თბილისის მერის მეუღლე ერთ-ერთ ინტერვიუში ამბობდა, მის ოჯახს საქართველოს კურორტები ძალიან უყვარს და ცდილობენ, ყოველთვის აქ გაატარონ არდადეგები.
ამჟამად არეშიძე ბავშვებთან ერთად ანანურში ისვენებს. სწორედ მთაში ცხოვრებაზე ოცნებობს დიზაინერი და იმედი აქვს, რომ ოდესმე ექნება მთაში სახლი, სადაც დილით ძროხის ზარის ხმა გააღვიძებს, ექნება ვენახი და ეყოლება ცხენები.
„როცა იტალიაში ვცხოვრობდით, თავისუფალ დროს საქართველოში ჩამოვდიოდით. ბავშვებიც არდადეგების ნაწილს სწორედ საქართველოში ატარებენ – აჭარაში, ბორჯომში და ბახმაროში. ჩემთვის ძალიან მნიშვნელოვანია, ბავშვებმა სწორედ საქართველოში გაატარონ უმეტესი დრო ზაფხულში“, – ამბობს დიზაინერი.
არეშიძის თქმით, ფავორიტი კურორტი ბახმაროა, სადაც კალაძეების დიდი ოჯახი ივლისის ბოლოს სამი კვირით მიდის, რადგან სოფლის პროდუქტები, ცხენებით ჯირითი, ტყეში სეირნობა, საღამოს კოცონზე სიმინდის შეწვა და ქართული სიმღერები – ეს არის ის, რაც მის შვილებს ძალიან უყვართ.