თბილისი, 14 ივლისი - Sputnik. მარნეულის რაიონის ხუთ სოფელს სამდღიანმა ძლიერმა წვიმამ და სეტყვამ მოსახლეობას პრობლემები შეუქმნა, იუწყება ტელეკომპანია Rustavi2.
სოფელ ქირაჩმუღლოში ბოლო სამი დღეა წვიმს, თუმცა გუშინ ღამით წვიმა იმდენად ძლიერი იყო, რომ ადგილობრივები მნიშვნელოვნად დააზარალა.
ძლიერმა წვიმამ ნაკვეთები, სახურავები, ღობეები და შიდა გზები დააზიანა, დატბორა საცხოვრებელი სახლების პირველი სართულები. გადაკეტილი იყო ცენტრალური მაგისტრალიც.
ადგილობრივების განცხადებით, სოფელში მოუწესრიგებელია სანიაღვრე არხები, რის გამოც ყოველი ძლიერი წვიმის დროს, მსგავსი პრობლემები ექმნებათ. მათი თქმით, თუ სანიაღვრე სისტემა არ მოწესრიგდა, ისინი მუდმივად საფრთხის წინაშე იქნებიან.