თბილისი, 4 ივლისი — Sputnik. საგანგებო სიტუაციების კოორდინაციისა და გადაუდებელი დახმარების ცენტრის ავტოპარკი 15 ახალი რეანიმობილით შეივსო, ნათქვამია ქვეყნის ჯანდაცვის სამინისტროს განცხადებაში.
ახალი მანქანები აღჭურვილია თანამედროვე აპარატურით, რაც საშუალებას იძლევა, პაციენტს დახმარება გაეწიოს მისი მდგომარეობის სიმძიმის მიუხედავად. ამასთან, ავტომობილებს რთული რელიეფის პირობებშიც შეუძლიათ გადაადგილება.
„ახალი ავტომობილები არის აღჭურვილი თანამედროვე სამედიცინო პირველად დახმარების აბსოლუტურად ყველანაირი სისტემით. მთავარი მომენტია, რომ ფაქტობრივად ავტოპარკში აღარ გვყავს არც ერთი ძველი და ვადაგასული ავტომობილი. ამის პარალელურად მიდის კადრების გადამზადებაც. აქედან გამომდინარე, უფრო ხელმისაწვდომი იქნება და უფრო თანამედროვე გადაუდებელ პირველ სამედიცინო დახმარებას მიიღებენ ჩვენი მოსახლეობა და ჩვენი სტუმრები", – განაცხადა ცენტრის ხელმძღვანელმა ავთანდილ თალაკვაძემ.
სასწრაფო დახმარების ავტოპარკის განახლება 2014 წელს დაიწყო. ამჟამად საქართველოს რეგიონებში 250 რეანიმობილია და ყველა – ახალი.