თბილისი, 4 ივლისი – Sputnik. რუსეთი სახიფათოდ მიიჩნევს ნატოში საქართველოს დაჩქარებული წესით მიღების შესახებ თეზისებს, განაცხადა რუსეთის საგარეო საქმეთა მინისტრის მოადგილემ გრიგორი კარასინმა ოთხშაბათს, ჟენევის დისკუსიების მორიგი რაუნდის შემდეგ.
რუსეთს არაერთხელ განუცხადებია, რომ კატეგორიულად ეწინააღმდეგება ნატოსთან საქართველოს თანამშრომლობის გაღრმავებას და ალიანსის გაფართოებას აღმოსავლეთისკენ.
„ჩვენ პარტნიორებთან ერთად აფხაზეთიდან და სამხრეთ ოსეთიდან გამოვყავით სამხრეთ კავკასიის რეგიონში აშშ-ისა და ნატოს მზარდი აქტიურობის თემატიკა... ჩვენი მხრიდან ხაზი გავუსვით ლონდონში ნატოს დეკემბრის სამიტის წინ ალიანსის წევრად საქართველოს დაჩქარებული წესით მიღების თეზისების სახიფათო ხასიათს“, – ციტირებს РИА Новости კარასინის სიტყვებს.
საქართველოსა და ნატოს ინსტიტუციური თანამშრომლობა 1994 წელს დაიწყო, როდესაც საქართველო გახდა „პარტნიორობა მშვიდობისათვის“ პროგრამის მონაწილე. 2004 წლიდან საქართველოსა და ალიანსის თანამშრომლობამ უფრო ინტენსიური ხასიათი შეიძინა, 2011 წელს კი საქართველომ მიიღო „ნატოს ასპირანტი ქვეყნის“ სტატუსი. 2014 წელს უელსის სამიტზე დამტკიცდა ნაბიჯების პაკეტი, რომლებიც საქართველოს დაეხმარებოდა ალიანსის წევრობისკენ სწრაფვაში.
ნატოს ხელმძღვანელობას არაერთხელ განუცხადებია, რომ ნატოს კარი ღიაა საქართველოსთვის, თუმცა ქვეყნის ალიანსში გაწევრიანების ვადებზე არავინ ლაპარაკობს.