თბილისი, 28 ივნისი – Sputnik. საქართველოს ეკონომიკისა და მდგრადი განვითარების სამინისტროს „მთის კურორტების განვითარების კომპანია“ გუდაურში ზაფხულის სეზონს გახსნის, იუწყება ტელეკომპანია Imedi.
გუდაური სტუმრებს 29 ივნისიდან მიიღებს.
გავრცელებული ინფორმაციით, ზაფხულის სეზონის განმავლობაში კურორტზე ყველა საბაგირო ყოველდღიურ რეჟიმში 10:00 საათიდან 18:00 საათამდე იმუშავებს.
ამასთან, კურორტზე ფუნქციონირებს საერთაშორისო დონის 5 ათასი მეტრი სიგრძის ველობილიკი, რომელიც გათვლილია როგორც პროფესიონალი ველომრბოლელებისთვის, ასევე მოყვარულებისთვის.
„საქართველოს სამთო-სათხილამურო კურორტების პოპულარიზაციისთვის შეიქმნა ფუნქციურად და ინფორმაციულად სრულყოფილი აპლიკაცია, რომელიც ერთი ბრენდის ქვეშ აერთიანებს ოთხ სამთო კურორტს: გუდაური, ბაკურიანი, გოდერძი, მესტია. აპლიკაცია უნიკალური გზამკვლევია, რომელიც როგორც ზამთრის, ასევე ზაფხულის სეზონზე მომხმარებელს მთის კურორტების შესახებ ამომწურავ ინფორმაცის აწვდის", – აღნიშნულია განცხადებაში.
საქართველოს ხელისუფლება ყველაფერს აკეთებს იმისთვის, რომ ქვეყნის სამთო კურორტები პოპულარული იყოს არა მხოლოდ ზამთარში, არამედ მთელი წლის განმავლობაში.
გუდაური - საქართველოს ერთ-ერთი ყველაზე თანამედროვე და განვითარებული ზამთრის კურორტია, რომელიც დიდი პოპულარობით სარგებლობს როგორც ქართველ, ისე უცხოელ ტურისტებში. კურორტი ზღვის დონიდან 2,2 ათასი მეტრის სიმაღლეზე მდებარეობს დიდი კავკასიონის ქედის სამხრეთ კალთაზე.